ನವದೆಹಲಿ : ಪ್ಲೇ ಗೇಮ್ಸ್ 24×7 ಮತ್ತು ರಮ್ಮಿ ಸರ್ಕಲ್ ಮತ್ತು ಮೈ 11 ಸರ್ಕಲ್ ಸೇರಿದಂತೆ ಅದರ ಸಂಬಂಧಿತ ಕಂಪನಿಗಳಿಗೆ 20,000 ಕೋಟಿ ರೂ.ಗಳ ಜಿಎಸ್​ಟಿ ಬಾಕಿ ನೋಟಿಸ್ ನೀಡಲಾಗಿದೆ ಎಂದು ವರದಿಯಾಗಿದೆಸುಮಾರು 55,000 ಕೋಟಿ ರೂ. ಸರಕು ಮತ್ತು ಸೇವಾ ತೆರಿಗೆ (ಜಿಎಸ್​ಟಿ) ವಂಚಿಸಿದ ಆರೋಪದ ಮೇಲೆ ಆನ್ಲೈನ್ ರಿಯಲ್ ಮನಿ ಗೇಮಿಂಗ್ (ಆರ್​ಎಂಜಿ) ಸಂಸ್ಥೆಗಳಿಗೆ ಜಿಎಸ್​ಟಿ ಗುಪ್ತಚರ ನಿರ್ದೇಶನಾಲಯ (ಡಿಜಿಜಿಐ) ಸುಮಾರು 12 ಪ್ರಿ-ಶೋಕಾಸ್ ನೋಟಿಸ್​​ಗಳನ್ನು ನೀಡಿದೆ ಎಂದು ವರದಿಯಾಗಿದೆ.ಒಟ್ಟಾರೆ 55 ಸಾವಿರ ಕೋಟಿ ರೂಪಾಯಿ ಜಿಎಸ್​​ಟಿ ಬಾಕಿ ಪಾವತಿಸುವಂತೆ ಆನ್ಲೈನ್​ ಗೇಮಿಂಗ್ ಕಂಪನಿಗಳಿಗೆ ನೋಟಿಸ್ ನೀಡಲಾಗಿದೆ.

. ಫ್ಯಾಂಟಸಿ ಸ್ಪೋರ್ಟ್ಸ್ ಪ್ಲಾಟ್​ಫಾರ್ಮ್​ ಡ್ರೀಮ್ 11ಗೆ 25,000 ಕೋಟಿ ರೂ.ಗಿಂತ ಹೆಚ್ಚಿನ ಮೊತ್ತದ ನೋಟಿಸ್ ನೀಡಲಾಗಿದೆ. ಆದರೆ ಡ್ರೀಮ್ 11 ಈವರೆಗೂ ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ. ಹೆಚ್ಚುವರಿಯಾಗಿ, ಹೆಡ್ ಡಿಜಿಟಲ್ ವರ್ಕ್ಸ್ ಗೆ 5,000 ಕೋಟಿ ರೂ.ಗಿಂತ ಹೆಚ್ಚಿನ ಮೊತ್ತಕ್ಕಾಗಿ ಪ್ರಿ-ಶೋಕಾಸ್ ನೋಟಿಸ್ ನೀಡಲಾಗಿದೆ. ರಮ್ಮಿ ಸರ್ಕಲ್ ಅಥವಾ ಮೈ 11 ಸರ್ಕಲ್ ಈ ಬಗ್ಗೆ ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ. ಇದಕ್ಕೂ ಮೊದಲು ಬೆಂಗಳೂರು ಮೂಲದ ಗೇಮ್ಸ್ ಕ್ರಾಫ್ಟ್ ಟೆಕ್ನಾಲಜಿ ಎಂಬ ಕಂಪನಿಗೆ ಒಟ್ಟು 21,000 ಕೋಟಿ ರೂ.ಗಳಷ್ಟು ಗರಿಷ್ಠ ಮೊತ್ತದ ಜಿಎಸ್​ಟಿ ಬಾಕಿ ಬೇಡಿಕೆಯ ನೋಟಿಸ್ ನೀಡಲಾಗಿತ್ತು.

ಡಿಜಿಜಿಐ ಎಣಿಕೆ ಮಾಡಿದಂತೆ ಆರ್​ಎಂಜಿ ಕಂಪನಿಗಳಿಂದ ಒಟ್ಟು ಜಿಎಸ್​ಟಿ ಬೇಡಿಕೆ 1 ಲಕ್ಷ ಕೋಟಿ ರೂ.ಗಳನ್ನು ತಲುಪಬಹುದು ಎಂದು ಉದ್ಯಮ ತಜ್ಞರು ಹೇಳಿದ್ದಾರೆ. ಆನ್ಲೈನ್ ಗೇಮಿಂಗ್ ಪ್ಲಾಟ್​ಫಾರ್ಮ್​ಗಳ ಮೇಲೆ ಶೇಕಡಾ 28 ರಷ್ಟು ಜಿಎಸ್​ಟಿ ವಿಧಿಸಲು ಜಿಎಸ್​ಟಿ ಕೌನ್ಸಿಲ್ ನಿರ್ಧಾರ ತೆಗೆದುಕೊಂಡ ನಂತರ ಈ ನೋಟಿಸ್​ಗಳನ್ನು ಕಳುಹಿಸಲಾಗಿದೆ. ಆರಂಭಿಕ ಹಂತದಲ್ಲಿ ಮಾಡಿದ ಬೆಟ್ಟಿಂಗ್​ಗಳ ಸಂಪೂರ್ಣ ಮುಖಬೆಲೆಯ ಆಧಾರದ ಮೇಲೆ ಜಿಎಸ್​ಟಿ ಲೆಕ್ಕಹಾಕಲಾಗುತ್ತದೆ.

ಡ್ರೀಮ್ 11 ಜೊತೆಗೆ, ಪ್ಲೇ ಗೇಮ್ಸ್ 24×7 ಮತ್ತು ಅದರ ಅಂಗಸಂಸ್ಥೆಗಳಿಗೆ ಮತ್ತು ಹೆಡ್ ಡಿಜಿಟಲ್ ವರ್ಕ್ಸ್ ಗೆ ಪ್ರೀ-ಶೋಕಾಸ್ ನೋಟಿಸ್ ಕಳುಹಿಸಲಾಗಿದೆ. ಅಧಿಕಾರಿಗಳು ಡಿಆರ್ ಸಿ -01 ಎ ಫಾರ್ಮ್ ಮೂಲಕ ನಿರ್ಧರಿಸಿದ ತೆರಿಗೆ ಬಾಕಿಗಳ ನೋಟಿಸ್​ಗಳನ್ನು ಸಹ ಹೊರಡಿಸಿದ್ದಾರೆ. ಮೂಲಗಳ ಪ್ರಕಾರ, ಹರ್ಷ್ ಜೈನ್ ನೇತೃತ್ವದ ಡ್ರೀಮ್ 11 ತನಗೆ ಕಳುಹಿಸಲಾದ ಶೋಕಾಸ್ ನೋಟಿಸ್​ಗೆ ಪ್ರತಿಕ್ರಿಯೆಯಾಗಿ ಬಾಂಬೆ ಹೈಕೋರ್ಟ್ ಅನ್ನು ಸಂಪರ್ಕಿಸಿದೆ. ಇದಲ್ಲದೆ, ಮುಂಬರುವ ವಾರಗಳಲ್ಲಿ ಇದೇ ರೀತಿಯ ಮತ್ತಷ್ಟು ನೋಟಿಸ್​ಗಳು ಬರಬಹುದು ಎಂದು ಕಂಪನಿ ನಿರೀಕ್ಷಿಸಿದೆ.