ಉದ್ಯೋಗಿಗಳ ಭವಿಷ್ಯ ನಿಧಿ ಸಂಸ್ಥೆಯು ತನ್ನ ಚಂದಾದಾರರಿಗೆ ಮಹತ್ವದ ಶುಭ ಸುದ್ದಿಯೊಂದನ್ನು ನೀಡಿದೆ. ಆಟೋ ಕ್ಲೈಮ್ ಸೆಟಲ್‌ಮೆಂಟ್‌ ಸೌಲಭ್ಯವನ್ನು ಮತ್ತಷ್ಟು ಉದ್ದೇಶಗಳಿಗೆ ಸಂಸ್ಥೆ ವಿಸ್ತರಿಸಿದೆ. ಸದ್ಯ ಅನಾರೋಗ್ಯದ ಚಿಕಿತ್ಸೆ ವೆಚ್ಚಕ್ಕೆ ಮಾತ್ರ ಈ ಸೌಲಭ್ಯ ಇತ್ತು. ಇದನ್ನೀಗ ಶಿಕ್ಷಣ, ಮದುವೆ ಮತ್ತು ವಸತಿ ಉದ್ದೇಶಗಳಿಗೂ ವಿಸ್ತರಿಸಿರುವುದಾಗಿ ಇಪಿಎಫ್‌ಒ ತಿಳಿಸಿದೆ. ಸುಮಾರು 6 ಕೋಟಿಗೂ ಹೆಚ್ಚಿನ ಚಂದಾದಾರರಿಗೆ ಈ ಹೊಸ ಸೌಲಭ್ಯ ಸಿಗಲಿದೆ.

ಈ ನಿರ್ಧಾರದಿಂದ ಯಾವುದೇ ಮಾನವ ಹಸ್ತಕ್ಷೇಪ ಇಲ್ಲದೆ ಐಟಿ ವ್ಯವಸ್ಥೆಯ ಮೂಲಕವೇ ಇಂತಹ ಕ್ಲೈಮ್‌ಗಳು ಸ್ವಯಂಚಾಲಿತವಾಗಿ ಪ್ರಕ್ರಿಯೆಗೊಳ್ಳಲಿವೆ. ಇದರಿಂದ ಪಿಎಫ್‌ ಕ್ಲೈಮ್‌ ಪ್ರಕ್ರಿಯೆ ಸುಲಭವಾಗಲಿದೆ.

ಈ ಹಿಂದೆ 2020ರ ಏಪ್ರಿಲ್‌ನಲ್ಲಿ ಅನಾರೋಗ್ಯದ ಚಿಕಿತ್ಸೆಯ ಉದ್ದೇಶಕ್ಕಾಗಿ ಕ್ಲೈಮ್ ಇತ್ಯರ್ಥದ ಸ್ವಯಂ ಮೋಡ್ ಅನ್ನು ಪರಿಚಯಿಸಲಾಗಿತ್ತು. ಈಗ ಇಪಿಎಫ್‌ ಯೋಜನೆ, 1952ರ ಪ್ಯಾರಾ 68ಕೆ (ಶಿಕ್ಷಣ ಮತ್ತು ಮದುವೆ ಉದ್ದೇಶ) ಮತ್ತು 68ಬಿ (ವಸತಿ ಉದ್ದೇಶ) ಅಡಿಯಲ್ಲಿ ಎಲ್ಲಾ ಕ್ಲೈಮ್‌ಗಳಿಗೆ ಆಟೋ ಕ್ಲೈಮ್ ಸೆಟಲ್‌ಮೆಂಟ್‌ ಸೌಲಭ್ಯವನ್ನು ವಿಸ್ತರಿಸಲಾಗಿದೆ. ಇದಲ್ಲದೆ, ಕ್ಲೈಮ್‌ ಮಿತಿಯನ್ನು ಕೂಡ ದ್ವಿಗುಣಗೊಳಿಸಲಾಗಿದೆ. ಅನಾರೋಗ್ಯ ಸಂಬಂಧಿತ ಕ್ಲೈಮ್‌ ಮಿತಿಯನ್ನು 50,000 ರೂ.ನಿಂದ 1,00,000 ರೂ.ಗೆ ಹೆಚ್ಚಿಸಲಾಗಿದೆ ಎಂದು ಉದ್ಯೋಗಿಗಳ ಭವಿಷ್ಯ ನಿಧಿ ಸಂಸ್ಥೆ ತನ್ನ ಪ್ರಕಟಣೆಯಲ್ಲಿ ತಿಳಿಸಿದೆ.

“ವಸತಿ, ಮದುವೆ ಮತ್ತು ಶಿಕ್ಷಣದ ಉದ್ದೇಶಗಳಿಗಾಗಿ ಆಟೋ ಕ್ಲೈಮ್‌ ವ್ಯಾಪ್ತಿಯನ್ನು ವಿಸ್ತರಣೆ ಮಾಡಿರುವುದರಿಂದ ಅನೇಕ ಸದಸ್ಯರಿಗೆ ತಮ್ಮ ಹಣವನ್ನು ಕಡಿಮೆ ಅವಧಿಯಲ್ಲಿ ನೇರವಾಗಿ ಪಡೆಯಲು ಸಹಾಯ ಮಾಡಲಿದೆ. ಇದು ಅವರ ಶಿಕ್ಷಣ, ಮದುವೆ, ವಸತಿ ಉದ್ದೇಶದ ವೆಚ್ಚಗಳನ್ನು ತ್ವರಿತವಾಗಿ ಪೂರೈಸಲು ನೆರವಾಗಲಿದೆ,” ಎಂದು ಇಪಿಎಫ್‌ಒ ಹೇಳಿದೆ.

ಇಪಿಎಫ್‌ಒ ಪ್ರಕಾರ, ಪ್ರಸಕ್ತ ವರ್ಷದಲ್ಲಿ ಸುಮಾರು 2.25 ಕೋಟಿ ಇಪಿಎಫ್‌ಒ ಸದಸ್ಯರು ಈ ಸೌಲಭ್ಯದ ಪ್ರಯೋಜನಗಳನ್ನು ಪಡೆದುಕೊಳ್ಳುವ ನಿರೀಕ್ಷೆ ಇದೆ. 2023-24ನೇ ಹಣಕಾಸು ವರ್ಷದಲ್ಲಿ ಇಪಿಎಫ್‌ಒ ಸುಮಾರು 4.45 ಕೋಟಿ ಕ್ಲೈಮ್‌ಗಳನ್ನು ಪ್ರಕ್ರಿಯೆಗೊಳಿಸಿತ್ತು. ಇದರಲ್ಲಿ ಶೇ. 60 ಅಥವಾ 2.84 ಕೋಟಿ ಕ್ಲೈಮ್‌ಗಳು ಮುಂಗಡ ಕ್ಲೈಮ್‌ಗಳಾಗಿವೆ. ಈ ವರ್ಷದಲ್ಲಿ ಇತ್ಯರ್ಥಪಡಿಸಲಾದ ಒಟ್ಟು ಮುಂಗಡ ಕ್ಲೈಮ್‌ಗಳಲ್ಲಿ ಸುಮಾರು 89.5 ಲಕ್ಷ ಕ್ಲೈಮ್‌ಗಳನ್ನು ಆಟೋ-ಮೋಡ್ ಬಳಸಿ ಪ್ರಕ್ರಿಯೆಗೊಳಿಸಲಾಗಿದೆ.

ಇಪಿಎಫ್‌ಒ ವಿಸ್ತೃತ ಆಟೋ-ಕ್ಲೇಮ್ ಸೌಲಭ್ಯವನ್ನು 2024ರ ಮೇ 6ರಿಂದಲೇ ಭಾರತದಾದ್ಯಂತ ಪರಿಚಯಿಸಲಾಗಿದೆ. ಮತ್ತು ಅಂದಿನಿಂದ ನಿವೃತ್ತಿ ನಿಧಿ ಸಂಸ್ಥೆಯು 13,011 ಪ್ರಕರಣಗಳಿಗೆ ಸಂಬಂಧಿಸಿದಂತೆ 45.95 ಕೋಟಿ ಮೊತ್ತವನ್ನು ಪ್ರಕ್ರಿಯೆಗೊಳಿಸಿದೆ.